OmegaT hè un prughjettu è un appiecazione à fonte aperta o « Open Source ». Vole si dì chì u codice di fonte di u prugramma hè dispunibule è chì a licenza d’OmegaT hè cuncepita per cuncede una libertà maiò à l’utilizatori. Quelli ponu impiegà OmegaT senza pagà è sò liberi dinù di cupià u prugramma è di distribuiscellu.
Un altru aspettu impurtantissimu di sta libertà hè chì l’utilizatori ponu mudificà u codice di u prugramma. D’altronde, per a mossa di l’« open source », ghjè più impurtante per l’utilizatori d’esse liberu di mudificà u prugramma daperelli in u scopu d’adattallu à i so bisogni, chè d’ùn avè nunda à pagà per impiegallu. Per traduce st’idea, si pò oppone quì « libertà d’espressione » à « entrata libera » in u sensu : di rigalu o senza pagà.
U prughjettu OmegaT hè animatu di u listessu spiritu. L’utilizatori ponu scaricà u prugramma è sò liberi d’impiegallu. Toccu à elli di cuntribuisce à u prughjettu ; l’utilizatori ci sò incuragiti ma micca custretti. Di più, a forma di participazione ùn hè micca imposta. Per indettu, hè pussibule di scrive u so propiu manuale di l’utilizatore o di fà un filmettu per mustrà cumu impiegà OmegaT ; e cuntribuzioni ghjudicate ghjuvevule da i membri di u prughjettu seranu messe à dispusizione di a cumunità di l’utilizatori d’OmegaT. Per e tacche di rutina, i vuluntarii chì travaglianu nant’à u prughjettu OmegaT godenu di a libertà a più maiò pussibule per sceglie a forma di a so cuntribuzione. Sta manera di non-intervenzione hè chjamata da u cuurdinatore attuale di prughjettu una « anarchia delegata »
Sarrimanenti, ci sò dinù duminii chì richiedenu un certu gradu di cuurdinazione. Per indettu, ognunu hè liberu di mudificà u codice di u prugramma d’OmegaT è di pruponelu à a squadra di sviluppu. A manera a più sicura per i sviluppatori di vede i so cambiamenti pigliati in contu hè di seguità l’istruzzioni scritte nant’à a pagina di cuntribuzione à OmegaT chì fà parte di a bella documentazione per i sviluppatori ufferta da OmegaT. Ma solu i cambiamenti chì sò ghjudicati ghjuvevule per l’utilizatori d’OmegaT seranu integrati à u prugramma. St’organizazione assicureghja a prutezzione di l’interessi di l’utilizatori è hà permessu dinù à OmegaT di guadagnà l’attestazione « 100% Free » da Softpedia.
Cum’è tutte l’altre attività di u prughjettu, a prugrammazione d’OmegaT hè fatta da vuluntarii chì amministreghjanu i sviluppi è l’amendamenti in armunia cù a filosufia di u prughjettu. D’altronde, l’utilizatori pudenu dà u so avisu di parechje manere per suggerì amendamenti è cuntribuì à u sviluppu è à l’avvene di u prughjettu.
In primu locu, ci vole à menziunà u gruppu d’utilizatori OmegaT. Ghjè u puntu centrale di a cumunità di l’utilizatori d’OmegaT. Hè ricumandatu à i novi utilizatori di facci e so sugestioni. In stu locu, si pò amparà chì a funzione desirata hè dighjà messa in ballu o chì ci hè raghjoni chì impediscenu a so messa in ballu. O ancu ch’elle esistenu funzioni o suluzioni più pratiche.
E discussioni tecniche di i cambiamenti sò pigliate direttamente in contu da i sviluppatori d’OmegaT. Per què, ci hè una lista specifica di diffusione per cuntattali.
Ogni sugestione di mudificazione o d’amendamentu d’OmegaT sottumessa da un utilizatore hè esaminata da a squadra di sviluppu. Sta prucedura simplificheghja l’amministrazione di e sugestioni numerose. Ogni pruposta, chjamata « request for feature enhancement (RFE) » in inglese, hè amministrata quì.
Dapoi u principiu di u prughjettu, centinaie di pruposte sò state sottumesse, è numerose sò quelle chì sò state sviluppate è messe in ballu. Sarrimanenti, una sottumissione ùn hè micca una assicuranza chì a pruposta serà autumaticamente sviluppata è distribuita. A scelta serà fatta da a squadra di sviluppu s’ella cunsidereghja chì ci serà un benefiziu per OmegaT, è dinù chì ci hè abbastanza risorse dispunibule per u sviluppu di a funzione nova.
I sviluppatori d’OmegaT, tutti vuluntarii, seranu più pronti à sviluppà una pruposta d’amendamentu s’è u travagliu di sviluppu hè finanziatu da quellu chì a dumanda. U cumparaticu hà dighjà permessu l’aghjuntu di certe funzioni.S’è vo site pronti à suvvensiunà u travagliu di sviluppu d’una funzione specifica ch’ellu vi piaceria d’impiegà in OmegaT, ci vole à cuntattà direttamente a squadra di sviluppu. Hè dinù pussibule chì d’altri sviluppi cummissiunati da sviluppatori esterni fussinu integrati in OmegaT. Quì dinù, u scopu principale di u sviluppu liberu hè listessu : ogni cambiamentu fattu à OmegaT deve esse un benefiziu per l’appiecazione è i so utilizatori.